रयत शिक्षण संस्थेच्या प्रलंबित प्रश्नांबाबत महसूलमंत्री चंद्रशेखर बावनकुळे यांच्याशी सकारात्मक चर्चा !

पनवेल दि.३०: महाराष्ट्राच्या शैक्षणिक क्षेत्रात आपल्या उल्लेखनीय कार्याचा ठसा उमटविणाऱ्या रयत शिक्षण संस्थेच्या विविध शाखांचे शासकीय स्तरावर प्रलंबित असलेले विविध प्रश्न मार्गी लावण्याच्या दृष्टीने रयत शिक्षण संस्थेच्या पदाधिकाऱ्यांनी राज्याचे महसूलमंत्री चंद्रशेखर बावनकुळे यांची भेट घेऊन चर्चा केली. या भेटीदरम्यान संस्थेच्या विविध शैक्षणिक शाखांसमोरील अडचणी, शासकीय पातळीवरील प्रलंबित विषय आणि त्यावरील संभाव्य उपाययोजनांकडे महसूलमंत्र्यांचे लक्ष वेधण्यात आले.
या बैठकीला रयत शिक्षण संस्थेच्या मॅनेजिंग कौन्सिलच्या सदस्य तथा खासदार सुप्रिया सुळे, संस्थेचे ज्येष्ठ मॅनेजिंग कौन्सिल सदस्य माजी खासदार लोकनेते रामशेठ ठाकूर, संस्थेचे चेअरमन चंद्रकांत दळवी, आमदार प्रशांत ठाकूर, माजी आमदार बाळाराम पाटील तसेच संस्थेचे सचिव किशोर राजे निंबाळकर उपस्थित होते.
रयत शिक्षण संस्था ही महाराष्ट्रातील बहुजन समाजातील विद्यार्थ्यांना शिक्षणाच्या मुख्य प्रवाहात आणण्यासाठी सातत्याने कार्यरत असलेली एक अग्रगण्य शैक्षणिक संस्था आहे. कर्मवीर भाऊराव पाटील यांनी रुजविलेल्या शिक्षण, समता आणि सामाजिक बांधिलकीच्या विचारांचा वारसा जपत संस्थेने ग्रामीण व शहरी भागांतील विद्यार्थ्यांना शिक्षणाच्या संधी उपलब्ध करून दिल्या आहेत. आर्थिकदृष्ट्या दुर्बल आणि ग्रामीण भागातील विद्यार्थ्यांच्या शैक्षणिक प्रगतीमध्ये संस्थेचे योगदान अत्यंत मोलाचे आहे. या पार्श्वभूमीवर संस्थेच्या विविध शाखांना भेडसावणाऱ्या अडचणी दूर होणे, शासकीय स्तरावर प्रलंबित असलेल्या विषयांवर योग्य निर्णय होणे आणि संस्थेच्या शैक्षणिक कामकाजाला अधिक गती मिळणे आवश्यक आहे. याच अनुषंगाने महसूलमंत्री चंद्रशेखर बावनकुळे यांची भेट घेऊन संबंधित प्रश्नांवर सविस्तर चर्चा करण्यात आली.
संस्थेच्या विविध शाखांच्या अडचणींचे निराकरण झाल्यास शैक्षणिक व्यवस्थापन अधिक सक्षम होण्यास मदत होईल, तसेच विद्यार्थ्यांना दर्जेदार शिक्षण देण्याच्या संस्थेच्या कार्याला अधिक बळ मिळेल. त्यामुळे शासकीय स्तरावरील प्रश्नांचा सकारात्मक विचार करून ते लवकरात लवकर मार्गी लावण्याची आवश्यकता या भेटीदरम्यान अधोरेखित करण्यात आली. रयत शिक्षण संस्थेच्या शैक्षणिक कार्याचा विस्तार, विद्यार्थ्यांचे हित आणि संस्थेच्या विविध शाखांचे प्रश्न सोडविण्याच्या दृष्टीने ही भेट महत्त्वपूर्ण ठरली.