उलवे ता. ३१ : द्रोणागिरी डोंगराच्या कुशीत आपल्या सहकाऱ्याचा बंगला असावा, हे स्वप्न प्रत्यक्षात साकार करणारा अवलिया म्हणजेच महेंद्रशेठ घरत होय. त्यांनी चक्क सव्वा कोटी रुपयांचा टुमदार शार्दुल’ बंगला त्यांचे जवळचे सहकारी,महाराष्ट्र प्रदेश काँग्रेस कमिटीचे सरचिटणीस मिलिंद पाडगावकर यांना आज भेट दिला. महेंद्र घरत यांनी बंगल्याचे स्वप्न साकार केल्याने पाडगावकर यांचे कुटुंबीय अत्यानंदात होते. मिलिंद पाडगावकर यांचे आई-वडीलही यावेळी बंगला पाहून भारावले होते. त्यांनाही आनंदाश्रू आवरत नव्हते. यावेळी महेंद्रशेठ घरत यांच्या सौभाग्यवती शुभांगीताई घरत उपस्थित होत्या. महेंद्र घरत यांनी सपत्निक संपूर्ण बंगल्याची पाहणी करून मनापासून पाडगावकर परिवाराला शुभेच्छा दिल्या. द्रोणागिरी डोंगराच्या कुशीतला बंगला, बंगल्याच्या टेरेसवरून होणारे द्रोणागिरी डोंगराचे नयनरम्य दर्शन पाहून महेंद्रशेठ घरत यांच्याही आनंदाला उधाण आले होते तेही खूष होते. यावेळी मिलिंद पाडगावकर यांच्या पत्नीने शुभांगी घरत यांची खणा-नारळाने ओटी भरली. यावेळी आंतरराष्ट्रीय कामगार नेते आणि रायगड जिल्हा काँग्रेस अध्यक्ष महेंद्रशेठ घरत म्हणाले,कार्यकर्त्यांच्या पाठीमागे मी खंबीरपणे उभा आहे. त्यांचीही स्वप्ने आहेत, ती पूर्ण करण्याचा मी प्रयत्न करीत आहे. परमेश्वराचा मला आशीर्वाद आहे, तो मला भरभरून देतोय, तो माझ्या मागे आहे आणि मी कार्यकर्त्यांच्या. पाडगावकर यांना बंगला भेट देऊन मी प्रामाणिक कार्यकर्त्याचे बंगल्याचे स्वप्न पूर्ण केले.’’
आजपर्यंत महेंद्रशेठ घरत यांनी अनेकांना कोट्यवधी रुपयांचे एकूण बारा बंगले बांधून दिलेत, तसेच अनेकांना फ्लॅट दिलेत, तर शेकडो कार्यकर्त्यांना घराचे स्वप्न साकार करण्यासाठी आर्थिक सहकार्यही केले आहे. त्यामुळे महेंद्रशेठ घरत यांची प्रतिमा कार्यकर्त्यांची स्वप्न पूर्ण करणारा नेता, अशी सर्वसामान्यांमध्ये झाली आहे.
यावेळी न्यू मॅरिटाईम ॲण्ड जनरल कामगार संघटनेचे सरचिटणीस वैभव पाटील, रायगड जिल्हा इंटक अध्यक्ष किरीट पाटील, उरण तालुका काँग्रेस कमिटी अध्यक्ष विनोद म्हात्रे, आदित्य घरत, कमलाकर घरत, लंकेश ठाकूर, आनंद ठाकूर, प्रकाश पाटील, बबन कांबळे, विवेक म्हात्रे आदी मान्यवर उपस्थित होते.