माथेरान दि.३ (मुकुंद रांजणे) : नेरळ माथेरान एकमेव मार्ग असल्याने पर्यायी व्यवस्था उपलब्ध व्हावी ही स्थानिकांची अनेक वर्षापासूनची मागणी होती त्यातच रोपवेचा प्रस्तावित प्रकल्पाला राज्य शासनाकडून नुकताच हिरवा कंदील मिळाल्यामुळे सर्वत्र आनंदाचे वातावरण दिसून येत आहे.
केंद्राच्या राष्ट्रीय राजमार्ग लॉजिस्टिक व्यवस्थापन लि.(एनएचएलएमएल) आणि राज्य सरकारकडून पर्वतमाला परीयोजनेअंतर्गत एकूण 45 रोपवे ची कामे हाती घेण्यात आली आहेत. नुकत्याच झालेल्या मंत्रिमंडळ बैठकीत त्याला मान्यताही देण्यात आली आहे. सरकारकडून १६ तर एनएचएलएमएल कडून २९ रोपवेची उभारणी करण्यात येणार आहे. यातील कोकण विभागात 11 तर पुणे विभागात 19 रोपवे असतील रोपवेची उभारणी करताना विविध पर्यायांचा वापर करण्यात येणार असून त्यात एनएचएलएमएल ला जागा उपलब्ध करून देणे आणि त्यात समभाग घेऊन महसूल मिळवणे राज्य सरकार कडून खाजगी सार्वजनिक प्रकल्पाच्या आधारावर उभारणी करणे आणि बांधा, वापरा हस्तांतरित करा या मार्गांचा अवलंब करण्यात येणार आहे. कोकण विभागातील माथेरानचा प्रस्तावित रोपवे प्रकल्प एमएमआरडीएच्या माध्यमातून पूर्णत्वास जाण्याची शक्यता आहे.त्यामुळे लवकरच हा महत्वाकांक्षी प्रकल्प पूर्ण होऊन पर्यटन वाढीसाठी केंद्रबिंदू ठरणार असल्याने या रोपवे ची कामे युद्धपातळीवर मार्गी लावावीत अशी मागणी जोर धरू लागली आहे.
माथेरानला दरवर्षी दहा लाखाच्या आसपास पर्यटक भेट देत असतात दर वीकेंडला सात ते आठ हजार पर्यटक नियमित हजेरी लावत आहेत. परंतु पुरेशी पार्किंग व्यवस्था नसल्याने सुट्ट्याच्या हंगामात घाटात वाहतूक कोंडी होत असते. त्यामुळे पर्यटक माथेरानला इच्छा असून येऊ शकत नाहीत. जर का रोपवे किंवा फिनिक्युलर रेल्वे ही पर्याय सेवा उपलब्ध झाल्यास पार्किंगची समस्या संपुष्टात येऊ शकते. पर्यटनात मोठी क्रांती घडवून सर्वाना आर्थिक समृद्धी प्राप्त होऊ शकते. माथेरानचा रोपवे पूर्ण झाल्यास तो आशिया खंडातील सर्वात लांब पल्ल्याचा रोपवे ठरू शकतो. महाराष्ट्र सरकारने किंवा एम एम आर डी ए ने माथेरान रोपवे प्रा. लिमिटेड हा मंजूर झालेला आहे तो ताब्यात घेऊन लवकरच काम सुरू करावे. माथेरानच्या रोपवेला परवानगी मिळून दहा वर्षे झालेली आहेत.तसेच सुप्रीम कोर्टाने परवानगी देऊन जवळपास आठ वर्षे पूर्ण झालेली आहेत. हा प्रकल्प रखडलेला आहे कोणती कंपनी फंडिंग करायला पुढे आले नाही. त्यामुळे सरकारनेच हा प्रोजेक्ट हाती घेऊन माथेरान पर्यायी व्यवस्था उपलब्ध करून द्यावी.
मनोज खेडकर – माजी नगराध्यक्ष माथेरान
