पनवेल महानगरपालिका मालमत्ता हस्तांतरण प्रणाली राबविणारी महाराष्ट्रातील पहिली महानगरपालिका
पनवेल,दि.5 : पनवेल महानगरपालिकेचा मालमत्ता कर विभाग तसेच महाराष्ट्र शासनाच्या नोंदणी व मुद्रांक विभाग यांच्या संयुक्त विद्यमाने एकत्रित मालमत्ता हस्तांतरण प्रणाली सुविधेचा शुभारंभ आज मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, पालकमंत्री उदय सामंत, महिला व बालविकास मंत्री आदिती तटकरे, विधान परिषद आमदार निरंजन डावखरे, अनिकेत तटकरे, विधानसभा आमदार भरत गोगावले, प्रशांत ठाकुर, रविंद्र पाटील, महेंद्र थोरवे, महेश बालदी, महेंद्र दळवी, डॉ. बाबासाहेब तंत्रशास्त्र विद्यापीठ, लोणेरे कुलगुरु प्रा.डॉ. कारभारी काळे, विभागीय आयुक्त कोकण विभाग डॉ. महेंद्र कल्याणकर, जिल्हाधिकारी डॉ. योगेश म्हसे, आयुक्त गणेश देशमुख यांच्या प्रमुख उपस्थितीत ‘शासन आपल्या दारी’ या कार्यक्रमांतर्गत लोणेरे, माणगाव येथे करण्यात आला. महाराष्ट्रात ही सुविधा राबविणारी ‘पनवेल महानगरपालिका’ ही पहिली महानगरपालिका आहे.
या सुविधेचा पनवेल महानगरपालिका कार्यक्षेत्रातील नागरिकांना मोठा फायदा होणार असून नागरिकांचा वेळ आणि पैसे या दोन्हीची बचत होणार आहे. सहाय्यक निबंधक पनवेल यांच्या कार्यालयामध्ये देखील या सुविधेची माहिती देणारे फलक दर्शनी भागात लावण्यात आले आहे जेणे करून याबाबत मालमत्ताधारकांमध्ये याबाबत माहिती मिळेल. या आर्थिक वर्षामध्ये महापालिकेचा मालमत्ता कर भरणाऱ्या मालमत्ताधारकांकडून उत्तम प्रतिसाद दिसून येत आहे. एप्रिल महिन्यापासून ते आज दिनांक 5 जानेवारी,2024 रोजी 236 कोटी रूपयांची भर महापालिकेच्या तिजोरीमध्ये झाली आहे. ऑनलाईन पध्दतीने मालमत्ता कर भरल्यास मालमत्तांधारकांना दोन टक्क्यांची सूट देण्यात येत आहे. महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेच www. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे.
