पनवेल दि.१९: उलवा नोडमधील खारकोपर रेल्वे स्टेशन जवळ महाराष्ट्राचे आराध्य दैवत छत्रपती शिवाजी महाराजांचा भव्य दिव्य अश्वारूढ पुतळा उभारण्यात येणार असून शिवजयंतीच्या मुहूर्तावर त्या जागेवर शिवजयंती साजरी करत महाराष्ट्राचे आराध्य दैवत छत्रपती शिवाजी महाराज यांना अभिवादन करण्यात आले.
जेथे शिवसृष्टी व शिवरायांचा अश्वारूढ पुतळा उभारण्यात येणार आहे त्याप्रत्यक्ष जागेवर आज जाऊन प्रतिमेचे पूजन माजी खासदार तथा समितीचे अध्यक्ष लोकनेते रामशेठ ठाकूर, आमदार प्रशांत ठाकूर, सरचिटणीस, कामगार नेते महेंद्र घरत, उद्योजक जे. एम. म्हात्रे, भाजपचे तालुकाध्यक्ष अरुणशेठ भगत, यांच्या प्रमुख उपस्थितीत करण्यात आले. यावेळी पंचायत समिती सदस्य रत्नप्रभा घरत, भाऊशेठ पाटील तसेच ग्रामस्थ मोठ्या संख्यने उपस्थित होते.
स्व. जनार्दन भगत साहेबांच्या संकल्पनेतून १९८१ साली महाराष्ट्राचे आराध्य दैवत छत्रपती शिवाजी महाराजांचा अर्धपुतळा उभारला गेला व तत्कालीन विरोधी पक्षनेते शरद पवार यांच्या हस्ते, तसेच स्वर्गीय दि. बा. पाटील, दत्तूशेठ पाटील, एन. डी. पाटील यांच्या उपस्थितीत अर्धपुतळ्याचे अनावरण संपन्न झाले होते. या पुतळ्यास आता तब्बल ४० वर्ष होत आहेत. गव्हाण विभागातून एस्सार, ओ.एन.जी.सी. माझगांव डॉक, १९८४ सालचा गौरवशाली – शौर्यशाली लढा व अनेक लढ्यांचे नेतृत्व करताना स्व. जनार्दन भगत साहेबांनी कोपर फाट्यावरील शिव छत्रपतींच्या पुतळ्याला अभिवादन करून अनेक लढे यशस्वी केले व कष्टकरी, शेतकरी, कामगारांना न्याय मिळवून दिला. अनेक लढ्यांचा साक्षीदार असलेल्या पुतळ्याची ४१ वर्ष सातत्याने ऊन पावसाचा परिणाम होऊन क्षति झालेली आहे. म्हणून गव्हाण विभागातील शिवछत्रपती स्मारक व उत्सव समितीचे नेते माजी खासदार रामशेठ ठाकूर, महेंद्र घरत यांनी छत्रपतींचा भव्यदिव्य अश्वारूढ पुतळा नव्याने विकसित होत असलेल्या उलवा नोड मध्ये उभा करण्याचा संकल्प मांडला व सिडको व्यवस्थापनाबरोबर अनेक वर्ष संघर्ष करून खारकोपर स्टेशन समोर सव्वा सहा एकर जागा मंजूर करून घेतली. यामध्ये सिडकोचे तत्कालीन चेअरमन आमदार प्रशांत ठाकूर यांचा सिंहाचा वाटा आहे. लवकरच या जागेवर शिवसृष्टी व शिवरायांचा अश्वारूढ पुतळा उभारण्याच्या कामाला सुरुवात होणार आहे.

By खबरबात 360 - एन. बी. व्हिडिओ

आम्ही साकारत आहोत प्रथमच वेबसाईट विश्वातील नवी संकल्पना 360 डिग्रीच्या भव्यतेतून "खबरबात ३६० डिग्री डॉट कॉम"

error: Content is protected !!