पनवेल दि.१५: ट्रेकिंगसाठी कर्नाळा किल्यावर आल्याचा मधमाशांच्या हल्यात एका पर्यटकाचा मृत्यू झाल्याची दुर्दैवी घटना आज घडली. संदीप गोपाळ पुरोहित ( वय ४४ रा. कोपरखैरणे) असे या मृत व्यक्तीचे नाव आहे. कर्नाळा किल्ल्यावर आलेय पर्यटकांवर मधमाशांनी केलेल्या हल्यामुळे त्यांची धावपळ उडाली यामध्ये संदीप यांच्या डोक्याला मार लागल्याने त्यांचा मृत्यू झाल्याचे पोलीसांनी सांगितले. मधमाशांच्या हल्यात अजून पाचजण जखमी असून त्यांची प्रकृती स्थिर असल्याची माहिती पोलीसांनी दिली आहे.
सुट्टी असल्याने शेकडो पर्यटक कर्नाळा किल्यावर आले होते. यामध्ये मुंबई येथील व्हीजेटीआय महाविद्यालयाचे विद्यार्थ्यांचा मोठा समुह होता. त्याचसोबत काही पालक आपल्या मुलांना कर्नाळा किल्यावर पर्यटनासाठी घेऊन आले होते. ४० ते ५० पर्यटकांचा गोंधळ झाल्यामुळे मधमाशा भडकल्याने त्यांनी अनेकांना दंश केले. या घटनेची माहिती पनवेल तालुका पोलीस ठाण्याचे वरिष्ठ पोलीस निरीक्षक गजानन घाडगे यांना मिळताच त्यांनी तातडीने पोलीस उपनिरीक्षक विष्णू टोने यांच्यासह पोलीस पथक रवाना केले. या दरम्यान जखमींनी रुग्णवाहिकेसाठी १०८ वर संपर्क साधल्याने जखमींना वेळीच मदत मिळाल्याचे प्रत्यक्षदर्शींनी सांगीतले. जखमींना पनवेल येथील उपजिल्हा रुग्णालयात उपचारासाठी दाखल करण्यात आले होते. पर्यटकांमध्ये जी धावपळ उडाली त्यापैकी एक संदीप पुरोहित हे आहेत. ४४ वर्षीय संदीप हे नवी मुंबईतील कोपरखैरणे येथे रहिवासी होते. आज ते कुटुंबासोबत कर्नाळा किल्ल्यावर पर्यटनासाठी आले होते. यावेळी संदीप यांच्या डोळ्याला मधमाशांनी दंश केल्यानंतर सैरावैरा हे धावू लागले आणि याच गोंधळात खाली पडल्यामुळे त्यांचा डोक्याला दगड लागून मोठ्या प्रमाणात रक्तस्त्राव झाल्याने उपचार मिळण्यापूर्वीच त्यांचा मृत्यू झाल्याची माहिती रुग्णालयातील डाॅक्टरांनी दिली.
